केही दिन अगाडि मात्र सामाजिक संजालमा एउटा भिडियो भाइरल भयो । जहाँ, एक सानी बालिका साउथ फिल्म ‘पुष्पाः द राइज’को सुपरहिट गीत ‘सामी सामी’मा गज्जबले नाचिरहेकी थिइन् । यो भिडियो भाइरल भएपछि सामाजिक संजालमा यो फिल्मकी नायिका रश्मीका मन्दनाले पनि भिडियो हेरिन् । भिडियो हेरेर प्रभावित भएकी उनले नेपाली बालिकालाई भेट्ने इच्छा राखेकी छिन् ।
सामाजिक संजालमा भिडियो शेयर गर्दै चर्चित नायिकाले आफ्नो दिन नै बनेको उल्लेख गरेकी छिन् । उनले लेखेकी छिन्–‘मेड माई डे । म यी सुन्दर बालिकालाई भेट्न चाहन्छु । तर, कसरी ?’
बारिसा क्षेत्री नाम गरेकी यी बालिका हैटौडाको रसल एकेडेमीकी छात्रा हुन् । उनी अहिले यूकेजीमा अध्ययन गरिरहेकी छिन् । विद्यालयमा हरेक शुक्रबार हुने अतिरिक्त क्रियाकलापका क्रममा उनले यो गीतमा नृत्य गरेकी थिइन् ।
रश्मीकाको यो डान्सलाई युटु्युबमा करोडौं पटक हेरिएको छ । रश्मीका भने नेपाली बालिका बारिसाको फ्यान बनेकी छिन् ।